((( ابن الفقير )))
كنت بصحى الصبح نايم
على صوت ديوكت عمتي
وخناقه جامده
على عودين دره بين البهايم
وبسرعة اغسل خلقتي
وبسرعة البس جزمت
والمريله اللى حيلتي
متنيله بقنطار سواد
امي تنادي
اصحى ياواد
المدرسة هتفوتك
اسالها ياماه مفيش فطار
تقولى يابني
منتى عارف من عشيه الفول خلص
وبسرعة اشيل الشنطة ف كتافي
وتجبلي امي من جارتنا قرشين سلف
وتقول لها ياختى كفياكي من الخلف
دول هدو حيلك
والمسؤولية ذلتك
ياختي بصي لصحتك
وابويا من قبل الاذان
قايم يدخن
وعلى وشه مرسوم الأسى
شايل هموم الكون دا كله
فى المدرسه
عايزين مصاريف الكتب
مكسوف أقوله
ومن يوميها
ودعت باب المدرسه
وكأنه حلم واتنسى
وعرفت انه مستحيل ابن الفقير
يتساوى بابن الوزير
بقلم /صياد اليمام
ليست هناك تعليقات:
إرسال تعليق