الدنيا دي
سحابه وصيف
وليل آخره بينور
تزعل ليه
تبات مهموم
ده كله ف وقته متقدر
دوس ع الحزن حتلاقي
للفرح يجي مليون باب
سنين الدنيا مش دايمه
ليه نعيشها كما الأغراب
مدام بإيدك تغيرها
حتزعل ليه. حتحزن ليه
عيش العمر واتفرج
اتعلم م اللي جرى حواليك
عيش الثانيه بالثانيه
خدها كده ببساطه
كتير الدنيا تعبتنا
وياما اديتنا شيكولاته
في ناس كانوا ف حياتنا
سابونا خلاص بقوا ذكرى
قربت لينا ناس تانيه
وجودهم سر سعادتنا
خلاص انسي ولا تزعل
اللي حصل حصل وخلاص
سحابه أكيد وحتعدي
سيبك من كلام الناس
نسمه صيف حتلقاها
احضن ايامك الوردي
عيش الفرح وياها
اهوه كله بيعدي
امبارح مش فاكره
ايه اللي جرى لي فيه
لكن أكيد أكيد بكره
وقت الفرح حعيش انا فيه
ليه اشغل بالي وأفكر
انا توكالي ع الخلاق
في ناس عايشه
وهمومها شيلاها
ع الكتاف أحمال
ادعي ربك سبحانه
قادر يغير حال من حال
تلاقي الفرح بيتمختر
كأنه ع الحصان خيال
وقتك لما بيعدي
يرجع تاني ؟
ده أصله محال
ولا تزعل ولا تحزن
عافر ف الحياه عادي
ماهي دنيا وعايشينها
حتتعب ليه ع الفاضي
ارسم فرحه ولونها
اصل الحياه كلها ألوان
يوم اسود ويوم ابيض
سيبك يالا م الاحزان
كلمات / سحر متولي
ليست هناك تعليقات:
إرسال تعليق