ظلم الإنسان
مظلوم وربى عالم الحال
غنى عن سؤالى فى كل مكان
واللى ظلمنى شقيق إنسان
من نفس جنسى وخلقى كمان
والرحمة من عند الرحمن
والإنسانية من الإنسان
فقير ضعيف مسكين عدمان
يظلمنى ليه ويسرقنى كمان
وساعات بيقتل كالحيوان
بدون لا شفقة ورحمة تمام
وكأنه ملبوس بالشيطان
او حتى راكبه كبير الجان
فى تجارة بيبيع فى الدكان
والغش عنده أشكال وألوان
ويقول شطارة وأيد فنان
والربح زايد فى المليان
ويكيد ويجحد بالإحسان
برغم لقبه صحيح إنسان
وممكن ده يقتل حتى أخوه
من دينه يعنى وأمه وأبوه
والعيب فى اهله ماكانوش ربوه
وبشره يكبر كده وسابوه
يمكن تحول كده حيوان
ومن انس أصبح كده كالجان
ازاى بيقتل روح إنسان
والنفخة كانت من الرحمن
بأى ذنب وجرم كمان
تظلم وتخدع ايا ان كان
والعقل عندك فى التوهان
والفكرة معمولة بجنان
أخويا يظلمنى فى ميراث
ويقول لى حقك فى البلاص
والأخت تحقد وبإخلاص
وتقول لاخوها أمشى خلاص
والجار بيكره برده الجار
ومن عينه يعنى يطق شرار
والست تحقد قوى وتغير
بشدة جدا بدون تفسير
اما الغنى بيزيد فى غناه
ويأكل فى حق فقير وياه
وناس بتقتل بإسم الدين
وتكفر الناس التانين
مين السبب فى الظلم يا ناس
وقتل المشاعر والإحساس
ده الانتحار حتى بالغاز
حرام وكفر برب الناس
الرحمة من عندك يا رحيم
صبرنى يعنى ليوم الدين
وارحمنى من ظلم الإنسان
لاخوه ووالده وعمه كمان.
مع تحيات الفقير إلى الله
ياسر شرف
كبير محررين مترجمين
باتحاد الاذاعة والتلفزيون
ليست هناك تعليقات:
إرسال تعليق