ليه تطلبي مني الحياة فوق الجليد
و السقعة دوبت مني عقلي الحديد
و روضت قلبي الكان عايش شريد
فُت عالبيت الكان بيضمنا
لقيته هو كمان حتة حديد
ماهو لولا كترة رقتك مكنش فينا حد داب
مكنش فينا حد ساب بكرة يعيد
تاريخ مكناش عايزينه يزيد
مكنش قلمي طاح شهيد
مكنش صحبي مات شهيد
في قطر كان و لا في سفينة
كلهم نغمة حزينة
بتتعزف علي أوتار شايخة مهينة
و لسة برضو عايزة ترميني ف اقرب جزيرة
العرب زادوني حيرة
زدنا م الشعر بيت
كيف و قدسي تايه بين ايدين منا و لينا
ايوة تايه بين ايدينا
لو كنا ما نهاب ممات و ما نجري ورا الحياة
مكنش يبقى القدس ليهم
مكنش مات قطر المدينة
مكنتش غرقت السفينة
و مكنتيش تطلبي مني الجمود فوق الجليد
مع إن نار صحراكي زينة
إنفضي غبارك و إعلنيها و عرفينا
بكرة ليهم و لا لينا
هتلبسيلنا توب ملون
و لا هتظلي حزينة
محمد التوني
ليست هناك تعليقات:
إرسال تعليق