بهية..وعيونها القوية.
****************
كلمات/صلاح خليفة
============
رحت فين ياعم (عزبي) ؟
قوم تعالي شوف بهية..
ياتري لساك فاكرها
لابسة طرحة وجلابية؟
لسة مجاريح الهوي..
بيشفوها يقولوا هيه؟
والرموش اللي بتقتل..
كل يوم ف الحب مية..
ياتري لسة بجمالهم؟..
كحلهم يحلي ف عينيا؟
ولا شدت رمش صيني
وعدسة لازقة للصبية ؟
*******
كان زمان يا عم( عزبي)
كل حي وفيه بهية...
كان جمالها بختم ربه
والحياء تاج البنية!
شط ترعة كان بيضحك
لما تملا القلة مية
فرع صفصافة يميل
ينحني يبوس الحورية
انت فين يا عم (عزبى)؟
قلي فين راحت بهية؟!
بهية راحت لما راحت
مننا العيشة الهنية
لما صوت الساقية ينعي
والشراقي ينادى مية
********
قالوا نداهة خدتها..
سابت البيت ف العشية
ركبت القطر المسافر..
والزحام فرم البنية
من يوميها ولسة فاكر
انها سافرت وجاية !
شوفتم اللي يروح بيرجع؟
كان رجع شبابي ليه!
فجأة قالوا بهية رجعت
قمت دعكت ف عينية!
شفت طرحتها رمتها
قلت عمر ماتبقي هية
بنطلون ع الركبة طق
وشق نفسه لفوق شوية!
ماشية تتغندر(ياعزبي)
كل يوم تعمل قضية
اللي ما يبصش تقول له
ليه مابتبحلقش فيا؟
شعرها بقي لونه احمر
مشيها رقص الغازية
شنطة (المكياج)لما خلصت
عملت البيت صيدلية
من زمان وبهية ماتت
بس غنوتها اللي حية
بأعشق الزمن اللي راح
والغنا في حياتي غية
كل م انسي يفكروني
ويقولوالي عيون بهية
اوعا تزعل عم(عزبى)
راح زمان الغنوة ديه
****************
كلمات/صلاح خليفة
ليست هناك تعليقات:
إرسال تعليق