مع طلة يومك
تاخد بعضك ومعاك الأجنة والمرزبة
وتسوق روحك ع الميدان
تسند ضهرك على سور الجامع
المشتاق لحطت بدنك على تل طواره
وتقعد مستنى فرج المولي عليك
وع الرجالة الشقيانه اللي قاعدين حواليك
تخرج من لفح الأنفاس المطلوقة
من صدرك ( فرجه قريب )
دا اللي خالقنا ما ها ينسى
الهربان من فقر بلاده وسايح
في بلاد الله عايش فيها غريب
طول عمرك راضي بنصيبك
وعارف أن الرزق قسمة ونصيب
ياااااه
من ساعة ما وعيت ع الدنيا
وأنت يا خيي بتكافح فيها وشقيان
الغلب محاوطك من يومك
وأنت بتحاول أن الدنيا تعوم على عومك
وتعيش فيها مستور
مجبور الخاطر وأقل ما تملكه أيدك
بيخليك متهني ومجبور
أصلك قنعان ما طمعتش في معيشة حد
أو أنك تحلم تبقى من الأعيان !!
الحلم بسيط على قد الشوف
لقمة هنية وفرشة راضية وأربع جدران
بتحاول تتغلب على كل ظروفك
وأنك تحيا وسط الخلق كإنسان
من يومك شبعان قانع باللي قسمهولك
ربك شاكر فضله وحمدان
لا بتحقد على حد أو بتغل في نفسك
م الهليبة اللي بيترمغوا في الهيلمان
ولا حتى لعنت الفقر في سرك
ولا قولت في يوم أنك تعبان
على قد براحك بتفرد طولك
مرتاح البال م اللي وهبهولك الحنان
ياااااه
على قد الصعب اللي انت عايش فيه
والهم الحاطط على صدرك
وأنت بتحاول تداريه
وصابر على عيشتك وعارف
أن اللي راح تزرعه ها يجي يوم تلاقيه
دي العافيه ها يكلها الدود
كلمة اتحفرت جوه في قلبك من الجدود
وأنك لازم تسعى على رزقك زي الطير
وأنك على عزة نفسك بتصونها من الغير
قوم يالا يا عبد الموجود
ها نزل رتش ونطلع رمله في الدور السابع
شغلة بسيطة بس ها ترجع منها مجبور !!
23 / 8 / 2017
الأديب / فتحي مصطفى
ليست هناك تعليقات:
إرسال تعليق