......... بلد المواجع......
البلد دي عايزه حد
يقدر يدافع عنها
مش كل واحد همه بس
ينهب فلوسها يعدها
احنا عايزين ليها حد
همه يعلى ف شأنها
يبقى ولد بين الرجال
قاصد مشاكلي يحلها
يبني بايده في البلد
يرفع جدارها بسقفها
قلبه عليها يكون غيوور
ويخلي باله منها
عايز بلدنا تكون عمار
شجره راحتنا بضلها
يزرع وفا يجني العطور
جنه يزينها نخلها
مش كل واحد قال انا
يقدر يحقق حلمها
ولا كل حد معاه فلوس
ممكن يعلى بصرحها
دا الكل جاي ناوي الخراب
فرحان بكسرة قلبها
نفسه يكون فوق الجميع
يحكم نجوعها بأسرها
ويطاطي ليه كل البشر
يكسر نفوسها يزلها
اصحى وفوقي يابلد
ذاد الأمور عن حدها
خليكي فاكره اني يوم
قولت الحقيقه في وقتها
لسه مجاش ابن البلد
ال اتولد من أجلها
وال اتولد علشان نعيش
فارس يخلد اسمها
عيني عليكي يابلد
خلوها تندب بختها
راح كل شى منها جميل
ضاعت ملامح شكلها
صبحت تنوح ذي الولاية
بايته الدموع على خدها
تبكي وبكاها فيه مرار
ينزف معاها جرحها
تملا كاستها من الأنين
ماتت وهيا في عزها
.............................
كلماتي جمال زياد
ليست هناك تعليقات:
إرسال تعليق