حارتى القديمة( حوش آدم )
حارتى ياناس إسمها حوش آدم
فيها عاش الجن مع البني آدم
وأحمد نجم وشيخنا إمام
بيتهم قدام بيتنا تمام
على طول لابسين جلاليب بكمام
وجواكت صوف لو شافوا غمام
قاعدين مع نجرو بتاع الشاي
وكل أملهم بكره الجاي
مع منقد فحم قاعد على حامل
وكرسى معسل بمزاج كامل
نجم بيشعر شيخنا يغني
وزوار فجر تاخدهم مني
وعلى باب الحارهةهناك قدام
بياع دره مشوى ينادي ياحمام
والست بديعة بتاعة الودع
نادهه ودعها يسوى البدع
إرمي بياضك هنا ياصبية
وارمى بياضك يادى الجدع
والست أمينه بقالة الحارة
ست كريمة ونعم الجارة
أشكك منها سيجارتين فرط
تقوللي هتدفع بكرة دا شرط
ييجى تاني يوم وانا جيبي مفلس
أهرب منها بدل ماتغلس
تقوللي تعالى ماتخافش ياطارق
دا مافيش بيني وبينك فارق
أمك أختي وأختك بنتي
ووالدك أخويا وستك نينتي
وجامع سيدي يحى فى آخر الحارة
هو المأوى فى وقت الغارة
حارتي قديمة من عصر الغوري
فيها جدودي وأصل جذوري
صبحت أطلال بعد الزلزال
ماهي كل الدنيا آخرها زوال
بقلم الشاعر طارق السيد
ليست هناك تعليقات:
إرسال تعليق