جحيم ونعيم
كارهك ياذنوبي يا مالية فى توبي إمتى يانفس تتوبي وتئوبي
ده شبر فى شبر هيحويني ولحاف تراب هيغطيني
ياحفرة نار راح تكويني ياروضة فى جنة هتئويني
راح أصوم وأصلي وأسد ديوني ودمع التوبه يغسلي عيوني
دنيا وفانية ولابسه زينتها أ؟خدت زخرفها ليوم آخرتها
ويوم آخرتها ده يوم النشر تلاقي وحوشها بتحشر حشر
تتبدل أرض بدال الأرض والسموات غير السموات
وييجي معايا سائق وشهيد وحدة بصري هتبقى حديد
وكتاب فى يميني ياإما شمالي مكتوب فى سطوره جميع أعمالي
أعمال غم وأعمال سارة وميزان عدل بمثقال ذرة
تلاقي النار فيها عاد وثمود وفرعون مصر مع النمرود
وحميم وسموم وشجر زقوم وناس وحجارة وشيطان مذموم
أما الجنة ياعيني عليها يارب ياقادر نفسي انا فيها
أنهار ونعيم وفرح وسرور ونور على نور مع حور فى قصور
ودهب مع فضة وكأس معين فضل ورحمة رب معين
آدي الجنة وآدي نعيمها…. وآدي جهنم وادي جحيمها
توبوا ياخوانا لرب الناس… قبل ماتيجي الفاس فى الراس
واقروا القرآن ويا الأحاديث… درع يصد فى سيف ابليس
دى حرب ودارت قبل وجودنا…حالف يغوينا نغرق فى ذنوبنا
نستغفر رب العرش ودودنا….. يفيض الدمع يبل خدودنا
نرجع تانى نحد حدودنا ……….ربنا قال ان عدتم عدنا
بقلم طارق السيد
ليست هناك تعليقات:
إرسال تعليق