حكايه ولغز
حكاية ولغز فى كلمة ونص
شغل عقلك قرب بص
ضلمة وشمعة وعود كبريت
ورياح عاتية وعين عفريت
أرض ومحرات وهاويس مقفول
والباب مفتاحه فى ايد الغول
جحر وديب وغزالة ضعيفة
ونسر حويط مستني الجيفة
سبع عجوز مع ناب مكسور
نسانيس وقرود وفرح وسرور
زحلفة مقلوبة على صدفتها
فوضى وشاملة وظابطة ساعتها
عيش وعدالة وكيلو حريه
فقر وظلم وطن أذية
كرش ولغد ونبرة ضيق
جلد وعضم ونشفان ريق
هم وغم وحزن وكرب
لترين جاز وشرارة حرب
حل اللغز بسيط قوي خالص
للي ماعمره ماخان ولا والس
الريح تطفي عود الكبريت
تبقى الضلمة وعين عفريت
حلوا الباقي إنتوا ياشطار
وإذا كان حد فيكم محتار
يسألني ساعتها وأرد عليه
بس إدعولي ولاد الإيه
مايجو ياخدوني م الدار للنار
بقلم طارق السيد
ليست هناك تعليقات:
إرسال تعليق