(فاكرة يا أمه )
فاكره يا امه ؟
لما كنتى بتشيلينى
لما باتعب تجرى بيا ؟
فاكرة حتى الجلابية ؟
لما كانت تبقى بيضا
من شقاوتى تبقى ميه
والتراب بيلم فيها
وكنت أشوفك شاخطة فيا
بس شخطك مش عشانها
كان تمللى خوف عليا
اوعى تنسى يا واد دروسك
عاوزة أشوفك ميه ميه
بكره لما الناس تشوفك
هيقولوا راجل مش ولية
فاكرة يا امه التمثيلية ؟
لما كات تجمعنا لمة
كنتى دايمة حاضنة فيا
وأما كات الدنيا ضلمة
ماسكة ايدى وهى هيا
عمرى يا امه ما انسى إنك
الوحيدة اللى فى عينيا
طب هقولك برضوا حاجة
فاكرة ليلة الامتحان ؟
لما كنت باصحى بدرى
وانتى صاحية كمان عشان
لو ناقصنى اى حاجة
شاى عصير او حتى كان
كنت الاقى قبل ما أطلب
كنت أحس بالأمان
فاكرة يا امه ايام زمان ؟
كنتى شايلة كتير وكاتمة
كنتى نبع من الحنان
سبحانه مين خلقك يا فاطمة
ع الأرض جاية من الجنان
واما فات العمر بيا ............
سيبت حضنك غصب عنى
بس صورتك حاضنة فيا
لسه باكتبلك واغنى
عشقى يا امه ونور عينيا
ولسه برضوا رغم سنى
لسه خايفة كتير عليا
ممكن انسى أى لمة
ممكن انسى التمثيلية
ممكن أنسى أى كلمة
ممكن انسى الدنيا ديا
بس حضنك انتى يا امه
حضن خالى من الأسية
مهما كات الدنيا ضلمة
نور عيونك ضى ليا
ليست هناك تعليقات:
إرسال تعليق