ولاد الاصول
ولاد الاصول محتارين
من قلة اصل البني آدمين
هي قلة اصل
ولا قلة دين
اعزف يا بتاع الربابة
انشد يا شيخ ياسين
اعزف يا بتاع الربابة
ودق على الوتر الحزين
انشد يا مولانا
وصحي الغفلانين
وقول كلام نبينا
عن صفات المنافقين
ولاد الاصول تاهوا
في معاملة البني آدمين
ولاد الاصول سواقي
بتروي شمال ويمين
بتروي ارض طارحة شوك
وتجرح الإيدين
ولاد الاصول محتارة
تعامل بس مين
الناس من النفاق
بقوا متلونين
ولاد الاصول شعارهم
كرامة من بعد دين
الناس اصبح شعارهم
هي المصلحة فين
اعزف يا بتاع الربابة
اعزف نغم حزين
خلي القلوب تنهنه
والدمع يملا العين
ولاد الاصول تعبوا
من غدر البني آدمين
ولاد الاصول نخل عالي
وطارح تمر زين
والناس ترميه بحجارة
عشان بلحتين
هيسقط البلح في اوانه
هيروح بس فين
مستعجلين الرزق
دايما يا بني آدمين
ولاد الاصول بتزعل
من كلمة ونظرة عين
وعتاب الناس سيف
على رقبة المحترمين
عتاب من قليل الاصل
كنت فاكره صاحب زين
طلع الحبيب وهم
والصاحب ب وشين
وبرغم كل اللي حصل
أنا متمسك بالدين
ونقول لقليل الأصل
كله سلف ودين
ليست هناك تعليقات:
إرسال تعليق