....... إقفل ياعم الباب ...........
بقلم الشاعر / كرم شخات
إقفل ياعم الباب
وكفاية رصْرصنا
من جو دى الأيام
أفْ أفنا وعَطَسْنا
هى صحيح هى
ولآ بقت موسكو
ينجدنا رب الجود
قادر يخْلصنا
أقفل ياعم الباب
لسانى عود أخضر
وحاسسنى ف السبعين
ع التلج دا يانا
مين اللى يُصبر مين
سحلب وشوربة عدس
ف المعدة باكبس كبس
والبرد إيه لازق
مش راضى مرة يلين
إقفل ياعم الباب
كانن أنا نِينى
لابس كلاسينى
مُعظم سعات يومى
قافش بطاطينى
نفسى أقوم أخرج
ألمح عُزاز عمرى
لكن دا يا عمرى
واللهِ على عينى
إقفل ياعم الباب
# كرم شحات #
ليست هناك تعليقات:
إرسال تعليق