آه يادنيا
_____________
آه يادنيا وآه يانى
عنيده قوى ومخصمانى
البسمه ضاعت من عمرى
والدمعه فوق خدى بتجرى
ما اعرفشى ليه مش سايبانى
الفرحه نسيانى وغايبه
والحزن سايباه علشانى
يوماتى ع الحال ده يا قلبى
آه يادنيا وآه يانى
كل اما امشى يا دنيا يمين
القاكى تيجى معايا شمال
نشفتى ريقى معاكى سنين
وماكنش يخطر يوم عالبال
للغش فيكى الف مسار
والبعد عنك زى النار
وكان بينى وبينك تار
حطمتى قلبى ووجدانى
آه يادنيا وآه يانى
عن اهلى دايما بعدانى
وحبايبى فيكى مخصمانى
واخدانى ليه من كل الناس
والناس بسببك نسيانى
غرقان شراعى الام وهموم
وانا قلبى ما بيعرفشى يعوم
وما ليش سواك ياكريم يا حنون
برحمتك تتولانى
آه يادنيا وآه يانى
الحظ ليه فيكى ناسينى
حرام عليكى تعاندينى
ضيعتى عقلى بلعبك ليه
ما كفايه بأه توهتينى
الفكر ضاع من افعالك
ضيعتى عمرى وسنينى
وأنا جوه بحر كأنه كابوس
باقب وأغطس فيه تانى
آه يادنيا وآه يانى
قدرى ومكتوب ف جبينى
ولا بد أشوفه أنا بعينى
باتمنى تخلص أحزانى
تصفالى مره يازمانى
والدنيا تضحك لى وتفرح
ابوس ايدكى ابتسمي لى
علشان أحبك من تانى
آه يادنيا وآه يانى
_________________
للشاعر قطب صلاح رمضان الشريف
ليست هناك تعليقات:
إرسال تعليق