(قطر الهم )
يا قطر الهم ليه ماشى
بدون قضبان
توزع هم ع الماشى
وع الفرحان
يا قطر الهم
انا تعبان
باشيل الهم فوق طاقتى
وبالمجان
كتبت الاسم فى بطاقتى
ضعيف غلبان
يا قطر الهم
أنا إنسان
ولو حتى ما اكونش مهم
فخلى عند أهلك دم
وبلاش أحزان
وحشنى الضحك لو مرة
وشغل جنان
صحيح ان الحياة مرة
وأنا مش جان
أنا عاشق
ومش هيمان
بحب البت
بنت فلان
وروحت لابوها أطلبها
حلف أيمان
يا أجيب المهر والشقة
يا أطول الهجر والفرقة
وسنين حرمان
أنا فى زل الحياة
بأتهان
باضحى كتير عشان لقمة
وناس بتاكلها بالمجان
يا قطر الهم ما تدوسنى
وخلينى فى كان ياما كان
بلاش فى الهم تهرسنى
ده انا عايش بروح إنسان
لكن من جوه متشتت
ضعيف رغم النفس .....ميت
سنين أحزان
صعبت كتير على الكافر
ولسه القلب بيعافر
ومش زهقان
يا قطر الهم يا تسافر
يا هخبط فيك وأموت كافر
ومش ندمان
#محمود_المزين
ليست هناك تعليقات:
إرسال تعليق