{ ديب العمر }
خاطرة مكتوبة بالعامية
~~~~~~~~~~~~~
يا سنين الطفولي
شو بكي
عـ بتندهي عليّي
كل يوم ليليي
بتركضي وبتغللي فيّي
خايفي من ديب العمر
يجي .... مخبى بـ ظلال القمر
من تلجات العمر البرداني
جاي من خلف سندياني
بعد ما غفيت الغابي
يشمشم تيابي
يعوي ويكشّر نيابو على عتابي
لاتخافي هيدا الهوا
كل يوم بيجي
وبتدقدق نهداتو على بوابي
بـ تفيّق خمرة العشاق من الخابي
وبتركض الكاسات ومنسّكر سوا
لا تخافي
يا سنين الولدني
هيك الدني
رح نبقى فيها سوا
ما نحنى عشنا سوا
ربينا سوا
وكتبنا حروفنا عـ حبال الهوا
وغنينا لـ السما تواشيح
بعرس الريح
ورسمنا ضحكاتنا
عـ وجه القمر ...... موال
ورسمنا من احلامنا الف شلال
وانطرنا سوا شمس بكرا
لا تروح
خليك بـ بحر صدري سفينة نوح
وقصة عمر للذكرى
وحروف
غفيت بعد سكرة عمر
متل عناقيد العنب بالخمر
داخل كتابي
علاء الغريب / كاتب صحفي
ليست هناك تعليقات:
إرسال تعليق