(أم البطل )
يا صوت الطلقة
أمانة عليكى
لتحنى
ده ابنى بيتسحب
منى
انا راضية
انا صابرة
وحابسة الدمعة
من ننى
ولكن اعذرى
انى
باقوم واصرخ
بعلو الصوت
أنا أم لبطل
بيموت
ده لسه الدبلة
فى صباعه
ما دوبهاش
خطيبته لما
جه خبره
راحت إنعاش
وأبوه شايل
كتير مكبوت
وأخوه حالف
يجيب تاره
وواد خاله
صنم منحوت
وقال بتهزرى
يا عمه
ومين قال مت
يا محمه ؟؟
هفتش كل دار
وهفوت
أنا شايفك يا أخويا
هناك
واقف فى الخدمة
والضحكة
على خدودك
ومش فايتاك
وسامع لسه
فيك الصوت
وأخته عروسة
فى الطرحة
ما لبستهاش
وقال هيجيها
فى فرحها
لكنه ما جاش
وجه عنه
خبر بالموت
يا طلقة فى
نبض قلبى
تفوت
أموت أنا بيكى
مية مرة
لكن ما يموت
يا بلدى الحرة
أنا موافقة
لكن بشروط
تجيبى بتارة
وبحرقة
فى أرض الموت
وأمانة يا طلقة
لتحنى
وخفى الصوت
ده ابنى بيتسحب
منى
بطل بيموت
وخشى فى صدرة
بالراحة
يموت مبسوط
هينزل دمه
فى الساحة
ويروى بيوت
ليست هناك تعليقات:
إرسال تعليق