شبعان وجع
.................
ماتكملوش
موتي بسكات
لو هان عليكم حبي يوم
افتكروا ذكرى م اللي فات
لو حتى مليانه بألم
ولا حياتي
بالنسبة ليكم ماتساويش
مستكترين الموت
في جسمي النحيل
ولا عشان
ميت وشبعان م الوجع
يبقى خلاص مليش حياة
وتضيع ما بينا الذكريات
وحلم إن أبقى
في يوم ملاك مبقاش متاح
موصوم
بكل أشكال الذنوب
وأضعف الإيمان أتوب
وازاي دا يحصل
والعمر أيل للغروب
والدنيا مليها الآهات
ناس همها تسرق حاجات
وناس قلوبها كالحجر
وناس في الزحمة
تسرق قلوب
واهي دايره بينا الذكريات
بين ناس عاشقه للوجع
وناس جواها حزن لممات
ورغم اللي فات
من بين كل الدروب
عشقت وهويت سكتك
كنت عايش بيك وليك
ماكنتش أعرف
إن قلبك مشتاق فراق
في أي لحظة تبعد بعيد
وتضيع مابينا الذكريات
والذكرى إيه
غير حبة وجع
إحساس ونبض
نظرة وشوية آهات
كانت مابينا
وفي آخر المشوار
اتنطورت هنا وهناك
أصبح مابينا كتير حواجز
تمنع وصول النبض
في شريان الحياة
أشياء كتير
مانعة الكلام
رافضة السلام
أو أي قول
يقول كان بينا لحظة م الغرام
يمكن صحيح ضاع الأمل
بس اللي فاكره
إني عايش دنيتك
عايش حكاوي قصتك
ولا عمري أنسى اللي مابينا
مهما عشنا سنين سكات
أصل اللي بينا
ممنوع محوه م الذاكره
مهما فرمطنا العقول
لا يمكن حاجه تتمحي
زي نحت فرعوني
منقوش على جدار الزمن
أكبر علامه مسجلة لكل البشر
أو زي المطر
تنقش على الأرض طريق مرور
وحتى لو قابلت صخور
عارفه طريقها اللي اتحفر
من كام سنة
وحبك مطر أو قول حفر
جوه نبض القلب طريق حياة
يعني لما أحب أشيلك
من جوه قلبي
أو لما أحب أمحي الذكريات
أكيد راح أمحي قلبي قبلك
ما أنت روحي
وقلبي من حبك
بيستمد أجمل حاجات
....................
بقلمي /حمدي رمضان ابوعمرو الريشي
ليست هناك تعليقات:
إرسال تعليق