(الجورنال )
أخبار أهرام جمهورية
أول صفحة كلام مش ليا
حبة سياسة وحبة نجاسة
وحبة نبييع أحلام وردية
والصفحة التانية
كلام للبيه
سهم البورصة
بسبعة جنية
بعد ما كان السهم بعشرة
مات م الحسرة ومالهوش دية
تالت صفحة
اتنين اخوات
واحد طخ التانى ومات
وأم شديدة
خدت تأبيدة
كات بتبيع فى حاجات منفية
رابع صفحة
صور شخصية
أصل فلانة
كانت فنانة
حبت واحد
جاب عربية
شافها فلان
فعمل إعلان
شوفوا فضيحة
هو وهى
خامس صفحة
فى علم الكورة
اتنين صفر
وخلصت فورة
نادى فلان
بيجيب فى أجوان
والاستاد فيه قلوب معمية
وآخر صفحة
كانت متنية
كلمة ونص
عن الحرية
حر فى أكلك
حر فى فكرك
حر ولكن
تبقى قضية
اوعى تفكر
تكتب كلمة
غير عن هيفا
ونانسى وسلمى
او عن ايتن
ولا حورية
لكن تكتب ع الغلبان
تبقى قضية وشغل جنان
لم لحافك
عيش فى أمان
وامشى وبيع
فى حاجات وهمية
واخبار أهرام جمهورية
ليست هناك تعليقات:
إرسال تعليق