(أيام زمان )
يا ضحكة جنان وكام صورة
يا لعب البلى والكورة
يا شغل جنان
يا درس وحفظ فى القرآن
يا شكل الصورة
جوه كتاب
يا فرحتنا
بيوم الألعاب
ولعب زمان
يا نظرة بريئة
فى مراية
يا لعب ملك
واستغماية
وكان يا مكان
فى قصة جميلة
بتنيم
وشكل الشمس
بتغيم
فنجرى كمان
وندعى يا رب
لو تشتى
واجيبلى فطيرة
من ستى
وأكلها وأنام
وحشتينى يا أحلى أيام
وحشنى الجرى
فى الشارع
فى درس حساب
وحشنى الهيصة
فى الكتاب
عشان سيدنا فى أجازة
وهيبقى غياب
فنجرى كتير ونتسابق
لحد الباب
وحشنى اللمة والأحباب
وجرى كتير عشان ماشية
ورانا كلاب
وقلب أبيض ما فيهش خراب
لا شاف الغدر والخسة
ومليان بالبياض لسه
بدون أسباب
يا ريتنى عملت مرة حساب
بنتقابل أنا ونفسى
كما الأغراب
وباسأل فين سنين عمرى
ومين سايب ومين اتساب
وباسأل ليه الزمن كداب ؟
يعشمنا بحاجات حلوة
ويطلع كله وهم سراب
وبارجع يتغلب أمرى
وأقول لاجمل سنين عمرى
وحشنى أيام ما كنت أحلم
لو أبقى شباب
#محمود_المزين
ليست هناك تعليقات:
إرسال تعليق