\\\\\\حبيبتي
في حبك كلام بيوعدني
بزمن تاني
عيشت اتمناه
في حبك لقيت طريقك
بياخدني لأغاني
خاليه من حروف الأه
في حضنك بفضفض وأحلم
بيكي اغاني
حلم عمري ما أنساه
في قربك لقيت الحب وعشانك
همشي الصعب
أنده احبك اصرخ انا عاشقك
يشوفني الكون جنين رحمك
وحبلي السري لازق فيكي
ومش مقطوع
اغيب سنين عنك لكن حاسك
لعمري شموع
انا خدك اللي بتجري في فرحتك
علي ارضه من الفرحه دموع
انا اللي كتبت علي شفايفك يوم
الوداع لسه لوداعي ليكي رجوع
انا اللي عطشان ومش خايف
في يوم من الجوع
لأنك في دنيتي عمري وعمري
انتي ياعمري
شاهد علي حبي رب الكون في
علو سماه
لو تغيبي بلاقي الدنيا ناقصه
كل حاجه
ناقصه سيرتك ناقصه عليه حيرتك
ناقصه تكشيره في حواجبك لما
بحس عليه غيرتك
ناقصه فنجان بترقص قهوته جوه
جدرانه
بالقساوه والمراره تحليه شفايفك
كل الدنيا ناقصه دنيا في
غير وجودك
حتي الربيع ناقص لون زهوره
من غير خدودك
وفي عز نومي الاقي قلبي يناديكي
حبيبتي انا الرحال فوق اراضيكي
حبي ليكي مش صدفه تايهه
حبي فيكي مش حروف فوق
السطوركتبها القلم وسابها
لا ياحبيبتي حبي ليكي خيط
متين رابط روحي بيكي
تعالي حبيبتي منك قربيني
ولما تحسي اني مت في هواكي
قربي المسيني
يمكن روحي ترد فيه تاني
من غير وجودك ما اقدرش
اعيش صدقيني
كل حاجه بعيده عنك جوه
عمري مخوفاني
كل شيء رابط عمري بعمرك
حتي سنين زماني
\\\\\\\\\\\\\ كلمات خاصه
\\\\\\\\\\\\\\\\ دكتور احمد حافظ
ليست هناك تعليقات:
إرسال تعليق