الطير المهاجر
========
قررت وفى لحظة اهاجر
واسيب فى بلدى واسافر
وقلت يالا هيلا هوبا
أعيش حياتى فى اوروبا
وتبقى الحياة حلوة هنية
وكفاية اكل الطعمية
وفى حظى يعنى كده اجرب
واشوف فى متعة واتغرب
فى هجرة يعنى بحرية
تهريب وغير الشرعية
زى زمايلى وقرايبى
والبس فى موضة كده غربى
والسعد اغرق فى بحوره
واقبض واصرف باليورو
واعمل فى قصة كده سبايكى
وشكلى يبقى مش شرقى
واصاحب فى سيلفيا وماريا
واسيب بهانة وبهية
والمية تجرى فى العالى
واعدل حياتى واحوالى
واكل فى بيتزا وباستا كمان
وكفاية فلفل وبتنجان
وتبقى الحياة حلوة هنية
بدون مشاكل نقدية
واغيظ محمد وعطية
ببدلة صيفى اوروبية
وابعت لاهلى يورو ودولار
ويبنوا بيت سيراميك وعمار
ويمكن امثل فى السيما
وانول فى شهرة كده عظيمة
ويشوفوا فيلمى فى الشاشة
ويقولوا معقول يا نداشة
احلام كتيرة ووردية
للهجرة تبقى معدية
وقلت اقابل فى السمسار
وادى له فى فلوس وانا محتار
لكن سمعت انه جبار
وممكن بسببه اخش النار
وياما غرقت كده فى بحار
سفن مراكب عليها صغار
وخفت يعنى من الابحار
وراجعت نفسى بإستمرار
وقلت ليه ابقى ضحية
وانا عندى فرصة محلية
ده مهما كان الرزق قليل
اعيش فى بلدى ووادى النيل
والذكريات رجعت بيا
ورق قلبى بحنية
وبرغم فقرى ونحسى كتير
قررت اعيش ده فى بلدى كريم
مع تحيات الفقير الى الله
ياسر شرف- كبير محررين مترجمين
بقطاع الاخبار- الاذاعة والتلفزيون
ليست هناك تعليقات:
إرسال تعليق