فراق الأم
بقلم \ الشاعر أحمد شاهين
إشتقت يا ناس لكحك
أمى وبسكوتها
لكلمة يا بنى. ولصوتها
لنظرة عينها وسكوتها
لحلة محشى أورديحى
لقعدتها هنا فى ريحى
وانا هايم فى ملكوتها
إشتقت لدعوه ويا الفجر
للياليها .إللى كلها قدر
لكون مليان ببركتها
وفاكر يا مه مش ناسى
صباحك لما قُلتى .إصحا
وافتح عينى ألائيكى
مليتى الدنيا بالفرحه
فطارى جميل . معاه الشاى
هدوم مغسوله . مكويه
وابوس إيدك تقولى إزاى
دا إبنى حبيبى ف عنييا
وفاكر لما روًحت الجيش
وانا راجع بلبس الجيش
حضنتينى وقولتيلى
تسلم للبلد وتعيش
حقيقى كُنتى بطبيعتك
وأسرانى كدا بطيبتك
وأى سؤال غريب عنك
أوام . تلائينى أنا جاوبتك
وعاشت أمى ع الفطره
وست بيت مفيش منها
ف شُغل البيت كانت شاطره
ما نستغناش ف يوم عنها
وعاشت تجمع الإخوات
تنسينا كدا الخلافات
تحببنا ف بعض أوى
وتحت جناحها نصحا . نبات
وكانت للقلوب جامعه
بحنيتها مُجتمعه
سعيده بيها ومعاها
ولا تفرقها يوم . دمعه
لكن لما تغيب الأم
بتبقى الدنيا مش هيه
حقيقى كل شئ بيغُم
من بعد ما فارقت الدنيا
كلمات \ أحمد شاهين
10 \ 7 \ 2016
ليست هناك تعليقات:
إرسال تعليق