جن مصوّر
بقلم الشاعر / طارق السيد
ياواد إنت ياجن مصوّر
وحياتي ياواد ما تحوّر
أنا برضو ياواد على كيفك
مالي زي أنا مهما تدوّر
ياواد إنت ياواد ياغزال
ياغنيوة وموال
إن جيتني ياروح الروح
يرتاح البال في الحال
لك حق ياواد تتعاجب
بالرمش ورسم الحاجب
جرب ياجميل وتعالى
وأنا أقوم وياك بالواجب
أنا زيك واد م الأصلي
إسأل عن أصلي وفصلي
واد زي ماقالوا م الآخر
مجدع م النوع الفاخر
مش توتو وسايبة مفاصلي
ولا يوم حد إترقصلي
مش هتزحزح وأتاخر
إلا أما تجيني ياأصلي
ياحبيبي ياضي عنيا
ياواد إنت يامقسوم ليا
ما بلاش ياجميل تعاندني
بكفاية لايمها شوية
بكرة الأيام هتدور
ياجميل إنت ياأمور
وزي مابجري وراك
راح يجي عليك الدور
وإنت إللي هتجري ورايا
وتدوب دوبان في هوايا
وفي قلبك يسكن حبي
ياللي إنت ساكن جوايا
بقلم طارق السيد
ليست هناك تعليقات:
إرسال تعليق