اللا إنسان
بقلم الشاعر / طارق السيد
يامستمعين خليكو واعيين
طرطأوا ودن وفتّحوا عين
كان ياما كان من قبل زمان
كان فيه حقيقي صحيح إنسان
كان فيه طيبة وفيه إحساس
كانت الناس بتحب الناس
كان الجار بيخاف على جاره
لو غاب يوم يحميله دياره
كان فيه صفاء كان فيه نقاء
كان فيه دواء دايما للداء
وكان الحب بنظرة عين
وغنوة بتوصل بين حبيبين
وخطفة قلب في السلامات
تسري الرعشة في إيد لتنين
وكانت الفسحة زمان في جنينة
والأزهار ألوان حوالينا
والعصافير بتطير وتغني
وإحنا معاها كمان غنينا
وكانت المتعة في عيشة الحارة
والتحويجة وطب عطارة
وبيض وأمارة وسمر عذارى
وحلق طارة لبنت الحارة
وكانت الدُقة غموس العيش
وكانت العيشة يادوب تناتيش
وكله عايش في أمان علشان
كل حرامي واقف له شاويش
كانت الدنيا مافيهاش غير
حمام وزتون وبشاير خير
يامستمعين ننتقل الآن
من زمني زمان إلى زمني الآن
في رحلة بحث وتنقيب عن
مخلوق نادر إسمه الإنسان
وبعد البحث مع التنقيب
في الدهاليز أو في السراديب
أسفر بحثنا عن ماهو آت
الإنسان إتحول ديب
ديب سعران فرحان بنيابه
غارزها في رقبة أغلى أحبابه
وكدب وغش وألفين وش
و دب و رزع و بوم و دش
وهتك في عرض شرف في الأرض
وهم وغم وشربات سم
قصر كلامي زمني زمان
غير زمني إللي بعيشه الآن
سلامي ختامي يامستمعين
أسيكو في زمن اللا إنسان
بقلم طارق السيد
ليست هناك تعليقات:
إرسال تعليق