أنا أسمي أمل
بقلم / الأثر المفقود
أمل ...
أنا اسمى امل
وساكنه ف شقة المساكين
فى درب الذل حارة الخوف
مشيت ع الشوك
بنيت حلمى
ظهر اسمى اللى كان محذوف
كتير قالوا الفقير ف بلادنا دى بينداس
هييجى اليوم تطاطى الراس
وتحنى جبينك العالى
ملل وكسوف
فى ناس طال الطريق بيهم
وم العتمه اللى حواليهم
نسوا الاحلام وقالوا ظروف
ودايما كنت ارد سكووت
وبسمه تترسم عايشه ومش بتموت
عشان كان الطريق معروف
لحلم بدايته كانت دمعه ع المكتوب
وقلب بينتفض رافض لحال مقلوب
وناس بتحسها شايفاك ومش بتشوف
وعشت ف روح انا اسمى اللى له مدلول
اخطى ع اللى مش معقول
امل مش بس عشته حروف
امل انشوده ع الهامش مابين سطرين
عيون بتبص ع المجهول
وصوت بيغنى ع المعزوف جفاه الخوف
سلاحى راح يكون ف كتاب
نويت اوصل ومش هيأس
سكوتى مش هقول اسهل ومش هخرس
هحاسب بلدى ع المكشوف
هحاسب كل صاحب مال
وكل جبان زرع فقرى وربى بين ضلوعى القهر
ووقفنا ف طابور وصفوف
نبوس الايد
شباب لكن ملامح م الهموم تجاعيد
دا كتر الظلم هد كتوف
وبكره يكون اكيد احلى
راح انسى الذل وانسى الخوف
كلمات ..عمر على
ليست هناك تعليقات:
إرسال تعليق