وجهة نظر
للشاعرة / سعاد الزامك
ياريته كان اختلاف وجهة نظر
ماكانش ظني خاب
و لا قلبي اتحسر
دي كلمة قاسية
و كنت ناسية
أنا اللي ليه و هُوة ليا
ياريت كمان كان إعتذر
جاي يقول طب ليه زعلتي
دانتي أختي
و فـ .. وحدتي
انتي صديقتي
و فـ بحر تُهت أنا فيه
كنتي ونيستي
و نسي إن القدر
ما يمنعوش حتى الحظر
جاي يقول ماكانش قصدي
و بلاش تِرُدي
كُتر الكلام
يجيب ملام
جرح و خصام
عشمي كمان تتقبلي مهما حصل
دا يا دوب .. اختلاف وجهة نظر
اختلاف وجهة نظر ؟
اختلاف وجهة نظر !!!
جاي يبتسم ... جاي يعتذر ؟
كان ملامي فـ كلمتين
دموع العين
على الخدين
نزلت سيول زي المطر
فاكر بكلمة يمحي ملامح غدر
و إلا ببسمة يبدل وصال الهجر
و عذاب باتحمله من بداية عمر
ياريتني أقدر أصدق
إنه اختلاف وجهة نظر
فكرت أبعد لجل مانسي
حاولت أقسى
و عملت ناسية
إنه حبيبي الغالي
مهما جرحني و قلبي انكسر
لسه حريصة أديلو فرصة
ماعملِش قِصة
و لسه حاسة
حـ يعترف بغلطتو
في حق قلبي اللى اتكسر
في كل مرة
كلمة مُرة
و دمعة حايرة
مابين رموش قايدة
لهيب الجمر
و قلبه أشد مـ الحجر
دا ابني و حبيبي
كمان طبيبي
راضية بنصيبي
بأغسل جدايل صبر
فـ رُبا شاربة كاسات المر
و بلاش تقول كان
اختلاف وجهة نظر
كان كابوس نَقْشُه حروف
زرع فـ شوقي الخوف
و كان عذاب ملهوف
جاي يدمر حكاية بنور الفجر
خبطت على كل البيبان
كنت بأدور عـ الحنان
أفتح بيبان
يقفل بيبان
حنانه كان مالو أمان
و أتحايل عـ الهوان
يبعد كمان و كمان
لكنه كان على الهجران مُصر
ضيع فرصة بعد فرصة بإستهتار
نسي كمان إن كاس المرار دوار
و نسي إني بأرفض الإنكسار
خليك براحتك لا أنا بانكسر
و لا بأحتار برغم جرح العمر
بركان غضب جوايا ثار
حمم الإباء غطت عـ الرحيل
في ليل طويل
واخدة القرار
بالمُختصر عمري ما بأغضب
من اختلاف وجهة نظر
ليست هناك تعليقات:
إرسال تعليق