ست البنات
بقلم الشاعر / أحمد المغربي
--------
ست بنات والاخ كبير
وابو العيال بيسوق حناطير
كان غلبان والحال علي قده
والبكرية جهازها اهو هده
لسة كتييير
طقم الصيني و6 كاسات
لسة القطن 7 قناطير
فرش سراير ومخدات
جاب سجاد ومجابش حصير
طقم حلل وتيفال وطاسات
والسكاكين سفرة وسواطير
فلس جيبه من الطلبات
عقله اتجن خلاص هيطير
كله ده ايه
لسة يدوب بكرية وبس
بكرة هيجي الدور ع الخمسة
من دلوقتي و دمه اتمص
والواد ولا حاسس بالهم
عايش طايش ياكل فايش
اصله جبلة معندوش دم
وامه كمان كت شايلة غوايش
كت وِرْثَها من أم لأم
باعت لاجل الدمع الجايش
لاجل يشيل الفرح الغم
ياللي تربي الواد وتدلع
بكرة الايام هتوريلك
بكرة يسيب الدنيا تولع
وقت ماتحتاجه ما يديلك
زي الباب لو سيبته مخلع
عمره مايستر مش هحكيلك
صلح بابك واظبط عوده
زي ماجودت ف يوم بالغالي
بكرة تنول من خيره وجوده
كتفه ف كتفك ولا هتبالي
يدوي جراح العمر وجوده
بقلم/ أحمد المغربي
ليست هناك تعليقات:
إرسال تعليق