يا قاصد راس العين بقلم الشاعرة / خديجة بلغنامى

ياقاَصْدْ راسْ العينْ

ياقاَصْدْ راسْ العينْ في ظْهيرة.

لا تْخَلِّي عْطْشْكْ

يعْمِي لِيكْ البْصِيرة 

العَقْبَة تَحْسَبها وطَا و حْدُورة

وفَدَّانْ الشُّوكْ تْظَنُّو بْحِيرَة 

سَّمْ لّْفَاعِي تْحَدُّو حْبِيلِة 

وسَّمْ بْني آدَمْ ماعْنْدُو دْوَا ولا جْبِيرَة

السَّنْ يضْحَكْ لِيكْ

وفوقْ بِيرْ يْفَرَّشْ لِيك حْصِيرَة

ويسْقيك شْهْد ْالكلام 

عْسْلْ و تْدْغميرة

صَادْقْ مُولْ الدار الكبيرة

ما يْخْدْعكْ مايفْضَحْ لِيك سْريرة

ماتحْزَن ْ على الخاْينْ

و ماتْنزَّلْ مِنْ دمْعَك قْطِيرة 

يشْقى بْفعالو وحْيَاتُو مْرِيرَة

بقلمي

خديجة بلغنامي