رسالة للجنيه
***********
ياخسارة مالكش لازمه
والنهارده مش بتسوي
لا قرش ولا مليم
مالك يابيه
قولي بس جرالك ايه
انت ليه كامش في روحك
ايه اللي عطل لك طموحك
لو علي كثرة جروحك
عادي شئ خدنا عليه
****************
في الميكروباص
انا حاسس بيك
ادفع جنيه
يقولوا ونص
وكل يوم عمال تخس
ماعرفش غلبك اخره ايه
****************
وفي التاكسي
ياحستي عليك
اقعد وابحلق في العداد
وقلبي يدق من الدفع
وتيجي المفاجاة
اعمل حسابي علي عشرين
الاقيهم سبعين جنيه
ماعرفش غلبك اخره ايه
***************
حتي الكاروو
اللي كان ببلاش زمان
ادبدل النهارده بحنطور
مايركبوش الا الذوات
وانت بقي ياعم الغلبان
عندك رجليك
ايه بقي فايدة الجنيه
ماعرفش غلبك اخره ايه
***************
محتاج اطبا ومراهم
اصل خطر الازمه داهم
حتي الريالات والدراهم
مطنشين ماعرفش ليه
المسانده مش حرام
ولا الحلال لاولاد الايه
بنوك الابالسه بقت متروسه
واحنا هنا مش لاقين الجنيه
ماعرفش غلبك اخره ايه
***************
وفوق ده كله الاخ دولار
عمال يلوشك في الاسعار
لو هو لحمه انت الممبار
ماتقومش طبخه ياعم عليه
قسما بالله قررت احاربك
واتحدي كل اللي يعاونك
لمناصرة اخويا الغلبان
واتحمل وبكره تكبر ياجنيه
*****************
شانك ياباشا من شاني
لو مش هتنشف صدقني
نضيع في رجلك وادي دقني
لو ماشوفنا بر ونرسي عليه
ها يصنفوك طيشه وسكه
واديك بقيت شبه الفكه
لازم اعالجك بنفسي
واخليك تسوي الف جنيه
*****************
كلمات بسيوني صديق
ليست هناك تعليقات:
إرسال تعليق