علي مسؤليتي
إن أعيش حياتي عادي
أوأكون غريب في بلادي
يبقي إيه مصير ولادي
لو نسيت المسؤليه
هي دي تبقي القضيه
مش مجرد نفسي أبقي
لاء بجد أنا لازم اشقي
والطموح بعديها يبقي
الحقيقه قصاد عينيا
وابقي قد المسؤليه
بس برده دي قضيه
فكر ناس متخلفه
صوره تبقي مؤسفه
كَسرِت مقاديف كتير
إيد شباب متكتفه
منهم اللي اتحدي وضعه
والكتير منهم ضحيه
والحلال كان فينا طبعه
نبقي قد المسؤليه
بس باقيه القضيه
ياما قالو كتير هنهرب
بره بلدنا من سكات
بس لما بجد قرب
وسط بحر راح ومات
حلم واتبخر وراح
مات ياعيني قصاد عينيا
كان بيحلم بالكفاح
كان يشيل المسؤليه
هي مش بس القضيه
القضيه واللي فيها
إن بلد ضمه ولادها
محتاجاه يكون سندها
غصب عنها راح وسبها
لما جاب العيب دا فيها
واللي فيها غصب عنها
من طراز المحسوبيه
عايشه راغم السرقه منها
يبقي مين اللي ضحيه
واضحه جداً القضيه
هو حلم حلمت اشوفه
كل واحد ينسى خوفه
والتحدي بين ظروفه
مش يعيش التمثليه
قبل ما العمر دا يدبل
نبني حلم يكون مستقبل
ولا لحظه مره نقبل
ننسا معني المسؤليه
أحمد طلبه
٢٠١٧/١١/١٦
علي مسؤليتي ـ الشاعر أحمد طلبه
ليست هناك تعليقات:
إرسال تعليق