عملت مقاطعة
يمكن تيجي بفايدة
اولهاحرمت نفسي من اللحمه
ونسيت طعم الملوخيه والفته
وضيف عليهم الكباب والكبده والكفته
اي نعم حسيت باني هزلان
وعايش في الدنيا زهقان
واللي يشوفني يلاقيني في التواهان
وده كله علشان الفقير والغلبان
ونحس ببعض ونعمل مشاركه
عملت مقاطعة
يمكن تيجي بفايدة
عملت مقاطعة للزيت والسكر
وقلت كفايه علينا الضغط والسكر
وبصراحة وبكل صراحه
ايدي اصبحت مش طايله
وقلت استراحه
يمكن بكره تحلو وتبقي هايله
والموضوع طول وتقل في دمه
الصبر جميل بكره هاتفرج
وقبل كده عملت مقاطعة
للفوانيس وياميش رمضان
ونسيت شكل الجوز واللوز
وقمر الدين والبلح السنه
وريقي نشف سبحان الديان
وجانا العيد وقلت مافيش كحك
الدقيق غالي والخباز فوق راسي بيدك
وجاتني هستريا بكاء مع ضحك
اكمل ولا بلاش بلاش لحسن اعك
وعملت مقاطعه
يمكن تيجي بفايده
للشحم والبنزين والسولار
وبدل العربيه اجرت حمار
بس برضه خايف لا تزيد الاسعار
والبرسيم يبقي بالكارت
وامشي له بالمشوار
ياريت علي قد كده وبس
هايتصنف وينصرف بالمعيار
برسيم ٨٠ و حشيش الدرة هايبقي نار
وعملت مقاطعة
يمكن تيجي بفايدة
للفواكه والخضروات
والبقوليات والنشويات
وعملت مقاطعة للكهرباء
بيسالوني هاتعيش في الضلمه
لاوالف لا. يكفيني نورالله
كل ده مش كفايه
وعملت مقاطعة
للغاز وبدلت البوتاجاز
وحطيت مكانه الكانون والوابورالجاز
علشان اشارك الفقراء
وترتاح وتمرح البهوات
كلمات بسيوني صديق
ليست هناك تعليقات:
إرسال تعليق