\\\\\\\ يا مصر
فوق ترابك نقشت خطايا
كلمة احبك لما كنت
ولد صغير
ضحكته نسمة امل لغصن
شايل طرح اخضر
كنت بحبي فوق ترابك
بحلم عاشق لاسمك يامصر
كان صبايا فرحه طارحه
ضحكه حلوه فوق غصونك
كان منايا ابقي فارس يصون
حدودك لما اكبر
كان غنايا كلمة احبك ياللي
اسمك قنديل ينور
كل الخبايا والخفايا عشان
ما اتوهشي
عنك في ليله واسهر ادور
عن ابن ليكي شيلتيه في عنيكي
ماخاف عليكي لقيته
لخيرها سارق
ابن بطنك نكر جميلك
ابن نيلك ابن ارضك خان
لعهدك وتاه في المفارق
ولسه غارق في الخطايا لكني
عارفه لونه خمري
لونه عتمه وليله ضلمه وفي
الظلم غارق
وفات صبايا لقيتك ناديتي
فتحتي بابك روحت المدارس
لقيتني حاسس بعشق خدني
لحروف هجاؤك
حنيني سابني ومعاه ماخدني
راح وجالك
جاي يقولك انا ابن بطنك
عرضي عرضك ومش هسيبك
لو حتي لحظه لحد تاني
وفوق ترابك هحمي اسمك
هبقي جندي شايل سلاحه
صوت رصاصه للي خانك
واللي دمر
وانا واللي صانك هنبني
بحبنا الفين مدينه
بعرق العزيمهولارضك نعمر
ونمد ايدينا فوق سطر غاوي
بيقول غناوي نسطر قصة كفاحك
رمسيس ومينا وباب المدينه واقف
عليه مداح ماسك ربابه
ومن غير كتابه صوته نادي
بيفسر طريق نجاحك
وتاريخ سماحك مع اللي جرحك
وقدرتي وعفيتي ياقلب ابيض
دايما بتصفي وتنسي جراحك
عهد عليه انا ابن ارضك وعهدي
معاكي عهد صادق
اصون ترابك يا اسم غالي
واسهرلك ليالي انده عليكي
انا عمري ليكي ومستحيل
ابدا اسيبك لحد تاني تاه
في المفارق
\\\\\\\\ بقلمي
\\\\\\\\\\\\ دكتور احمد حافظ
ليست هناك تعليقات:
إرسال تعليق