(مات اللى كان شيال )
مسافر شنطته
فى كتفه
ومش همه
بياخد حضن
من أمه
وبيودع مراته
وعيال
وكان يضحك
وعال العال
وعاوزين ايه
وانا راجع
يلاقى فى خده
مية بوسة
وكلمة تبين
الدافع
يا بابا هاتلى
بسبوسة
ودعوة تنجى
م الأهوال
وبص بسرعة
فجأة وقال
خلاص القطر
هيفوتنى
انا همشى
خلاص يا عيال
وفارق حضنهم يجرى
وقال ربى
عليك تُكال
ويوصل بدرى
كان فيه مجال
فلف بسرعة
على كرسى
يكون فاضى
عليه يتشال
وطول السكة
بيفكر
فى أحزانه
ويبنى آمال
يقول أهو بكرة
تتعدل
وتتبدل
يوم الأحوال
ما دمت
بنعمته راضى
خلاص عادى
ما فيش أحمال
وكان واقف
ومن غير صوت
ملاك اسمه
ملاك الموت
بيسمع كل شىء
يتقال
ويستعجب
على الدنيا
وناس عارفة
انها فانية
وبتفكر
فى قولنا وقال
وفجأة الكل
متلخبط
وقطره فى التانى
بيخبط
وهو يروح
لموت فى الحال
ودق الباب
على ولاده
وكان بدرى
على ميعاد
فيلقوه ع الكتاف
متشال
فتطلع صرخه
من أمه
وبنته فى حضنه
بتضمه
خلاص مات
اللى كان شيال
#محمود_المزين
ليست هناك تعليقات:
إرسال تعليق