في السكه في السكه في السكه
إوعي تغيب عن موت
.. في السكه
إلا الباشا الحوت..
في السكه
عايش هنا مبسوط..
في السكه
وانت قتيل هلفوت..
في السكه
...
وطي قفاك يا جميل
ومع الأغنيه وميل
مع أكلك اتعب. شيل
دي نهايتك جثه.. قتيل
في السكه
...
من ستين سنه مسروق
ومطاطي وخفه وذوق
ما تسوق علي مهلك سوق
ما اهو بكره الدنيا تروق
في السكه
...
عاملين علي مصر مؤامره
عاوزينها مولعه. جمره
ما تسيب الباشا. والخمره
وتغور في جهنم حمرا
في السكه
...
هتموت عيان متسرطن
تعذيب فرعون متفرعن
وضحية جيل متشيطن
مقتول غيظاً أو قهراً
في السكه
...
يا ابني انت ماليكش حنان
هو انت في أنهي زمان
فاكر نفسك انسان
ارهابي. عميل. اخوان
في السكه
...
وفي كل الحال مقتول
خايف من شكل الغول
خليك جاهل وجهول
مشغول بشوية فول
في السكه
...
إياك تظهر ع الشاشه
واعمل تعظيم للباشا
طاطي ونافق ببشاشه
تاكل سكر وبغاشه
في السكه
...
انا عاوزك هادي وخايف
مسطول. وعبيط أو هايف
راح تفتح بقك.. عارف
هتموت. كيف ما ابقي انا شايف
في السكه
...
في السكه حزين وجعان
انا مصري ومش انسان
انا دمي فوق القضبان
ودموعي دموع غلبان
في السكه
...
خالد محمد
ليست هناك تعليقات:
إرسال تعليق