يابختك ....
اااااااه ......!
طمعااااان فى كرم الله
وبحسدك على اللى انت فيه
ما انا .. من البرد نشفت وتعبت
حطام إنسان ...!
فى عز الصبا ... لكن ....!
ياما قاسيت حرمان
الجسد عريان
من الحلم عريان
احلامنا فى الفتارين
ولا قلب مره يلين
ويحن على المساكين
سامحنى يا تمثال
يا ابو حظ عال العال
حظك يا عم يمين
وأنا اللى حظى شمال
شايل يا عم هدوم
وأنا بشيل فى هموم
ويوماتى يوم ورا يوم
بتزيد عليا احمال
ولا ليا اى لزوم
فى الدنيا زى خيال
مع انى من الأوجاع
كأنى بشيل فى جبال
بدل القلوب ما تطبطب
تقسى عليا وتضرب
دنيا حزينه تكهرب
الفرحه فيها بتهرب
انا مش شاعر ربابه
ولا مطرب للغلابه
لكن يا دنيا تعبت
من ناس وشوشهم خير
وملايكه زى الطير
وحقيقتهم ديابه
من بكره .....!!!
خايف .....!
ومش شايف .....!
غير الجفا والصد
صدقنى ... من غير قصد
باشوفك ودموعى فى عنيا
وفى قلبى ليك الود
وبجد باقه ورد
ومعاها احلى تحيه
بس القهر جوايا
لاحلامى اللى منسيه
وايديا ... اهى نضيفه
والنفس حره شريفه
وأحلامي والله عفيفة
لكن ...! ..القهره مره
والعين علينا كفيفه
من جوه غير بره
والحوجه عوجه
وفى عز طوبه
ملعونه يا رطوبه
ونفسى صعبت عليا
أما بفكر ... ومش يتنكر ....!
النفس راضيه وبالايمان مرويه
لكن كسرنى الهم
وضاع الحلم
قرصنى الجوع
وده الموضوع ...
للى شايفاه عنيا
ومش ليا ....
.
.
.
.
.
بقلمى ------ عادل على
ليست هناك تعليقات:
إرسال تعليق