زمنى زمان زمن الأفلام كان يتقال فيها أحلى كلام
فى لعبة ست على الدريوكه وابور الجاز حب فى كاريوكا
عزيز عثمان اخدوه لبنان وهناك عشوه
ان قال بلاليكه بشاره واكيم بيقول بلا شو
وراح بلاليكه عشق كاريوكا وطبلها على دومّه وتكه
عشان ماهو سكه راح إيداها سكه وقال وانا مالى لايمني الفكه
وسلامه بسلامته آهو لف بلاد يتمنى يصرخ وينادي
محمود وجهاد
وحرب تتار وهولاكو جبار مع خوذه ودرع وسيف بتار
وسيف بلطاى دبح أقطاى..بعديها بلطاى شوفوا مات إزاى
افلامنا زمان كده غير دلوقتى . بيبدأ فيلم ويخلص وقتى
وبطل الفيلم ده واد حشاش ومعاه رقاصه وكام رشاش
يايكون عبده وشهرته موته يايكون واحد اسمه القشاش
والتصوير فى شقوق الحارة يانهار خارجي فى أبو رواش
فين أيام آسيا وشاهين طب فين فيلم صلاح الدين
كان احمد مظهر دايما يظهر وقت الجد فارس مغوار
قال للغرب فى وقت الحرب إن تيجوا بلادنا تيجوا زوار
وصلاح نظمى تخاف أعاديه من وشه الصارم
والعوام إن يوم راح سوريا بيوصل عايم
ومليجى بيحاكم الأخت لويزا رماها بزور وكلام ماله عوزه
واحمد لوكسر جوز فرجينيا رينو السفاح آهو خرب الدنيا
وجمال فرجِينيا زى الدنيا آخره زوال
وعمك ريتشارد بعد حروبه سلم فى الحال
قصر كلامنا كانت أفلامنا فى ماضي زمانا فتيل أحلامنا
أما أغاني زمان ياخوانا تخش قلوبنا قبل ودانا
سومه وحليم وكلام يتغنى وفايزه تغني لتمر الحنه
تعالى دلوقت اسمع أغانينا تعالى شوف حالنا وابكي علينا
اللى يفحر واللى يمحر واللى بيرغي كتير ويلت
واللى يغنى بكل بجاحه يغنى يقول هاتى بوسه يابت
واللى شرب فى سيجارته البنى بعديها غنى دماغى بتاكلني
طب وانا مالى ياعم ومالك هى دماغي ولا دماغك
ياهل المغنى كفايه أغاني أبوس فى دماغكو دماغي وجعاني
آدي زمانا وادي سوء حاله وادي زمني زمان وده سر جماله
غنوه وقالها سمعه زمان ومحمد فوزى وبوحه كمان
زمنى زمان غير دلوقتى ياريت يازمان تيجي دلوقتي
بقلم طارق السيد
ليست هناك تعليقات:
إرسال تعليق