ياقلبى اوعى بقلمى يوسف ونيس مجلع

 ياقلبى اوعى

بقلمى يوسف ونيس مجلع

اصدقائى الاحباء كل عام وانتم بخير – من الديوان المجمع لبيت الشعراء

كلمة بالعامية بعنوان ياقلبى اوعى

ليه النجوم مش لامعة --------- والقمر غاب قوام

لابشاير فجر طالعة ----------- ولا الاشواق بتنام

اوعى ياقلبى اوعى ----------- لا يكون حبة كلام

----------------------------------------------------------- 

ياما قولت لك اوعى ---------- بحور حريق الهيام

لا انت قد اللوعة ----------- ولا فى الغريق عوام

اوعى ياقلبى اوعى --------- لا يكون تزويق كلام

---------------------------------------------------------- 

وعيتك وما بتوعى -------------- وتايه بين اوهام

خليتك زى شمعة ------------- قايدة حنين وغرام

تسهر لغيرها والعة ----------- وغيرها هواه ينام

---------------------------------------------------------- 

وتبات عيوننا دامعة ----------- تبكى ناسيها المنام

لا رنة تليفوننا سامعة ------- ولا رسالة فيها سلام

لا مرة مسحلنا دمعة ---------- ولا مرة قال حرام

---------------------------------------------------------- 

يطلع يوماتى ببدعة --------- ونصدق له كل كلام

ونقع نفس الوقعة ------------ وما بيفيدناش علام

فاكر قال لنا جمعة ----------- واهى فاتت اعوام

بليالى حنينها ولعة -------- والليلة اطول من عام

---------------------------------------------------------- 

ياقلبى فى عشقك روعة ----- حبك والوفا انسجام

ودا قلبه استاذ ملاوعة ------- وانت ساذج غرام

غلبت اقول لك اوعى ------- وسيبك دا بس كلام

بقلمى يوسف ونيس مجلع